Magaalada Nairobi ee caasimadda dalka Kenya waxaa ka socda shirar is-daba joog ah oo ay leeyihiin waxgaradka, odayaasha iyo qeybaha kala duwan ee beesha Sade, kuwaasoo looga arrinsanayo helitaanka Ugaas beddela Allaha u naxariistee Ugaas Cumar Ugaas Xirsi.
Shirarkan ayaa ka dambeeyey markii uu Nairobi dabayaaqadii toddobaadkii hore soo gaaray Maxamed Ugaas Xaashi Ugaas Xirsi oo ah ninka loo wado in loo caleemo saaro Ugaasnimada cusub ee beesha Sade, kulamada waxaa diiradda lagu saarayaa cidda ay tahay in hoggaanka dhaqanka ay qabato, waxa looga baahan yahay iyo tashiyo lala yeelanayo dhammaan jifooyinka beesha oo ay matalayaan Nabadoonno iyo waxgarad kale.
Guddi ka kooban 13-xubnood oo gudaha iyo dibadda dalka isaga yimid ayaa Nairobi badankood ku sugan hadda, waxay shirar la qaateen odayaal dhaqameed ay kala hadleen soo jeedintooda ku aaddan cidda ay tahay in ay Ugaaska Sade ee xiga u igmadaan.
Sida ay qaar kamid ah xubnaha guddigan sheegeen jifooyinka waxay ku talo bixiyeen in Maxamed Ugaas Xaashi uu noqdo Ugaas beesha Sade si loo helo midnimo iyo qof leh hoggaamin wanaagsan, Maxamed waxaa uu kulamo u badnaa salaan iyo is-arag la qaatay Jaaliyadda Sade ee Kenya.
Qorshaha waxaa uu yahay in marka la soo gabagabeeyo shirarkan la aado gobolka Gedo si loo shaaciyo Ugaaska cusub, sidoo kale xubnaha guddiga waxay warbixin siin doonaan dhawaan saxaafadda, oo ay kaga hadli doonaan wixii u qabsoomay.
Maxamed Ugaas Xaashi Ugaas Xirsi waa aqoonyahan ah oo Ugaas Cumar uu adeer u ahaa, aabihii ayaa mar Ugaas ahaa, wuxuu muddo ku noolaa qurbaha isagoo la soo shaqeeyey dowladdii Kacaanka iyo hay'ado samafal. Dadka yaqaano waxay ku sifeynayaan nin qalbi furan oo leh awood hoggaamineed, kartina u leh in uu dadka hadal siin karo, iskuna keeni karo beesha.
Waxaa loo badinayaa in beelweynta Sade isku raaci doonto in Maxamed Ugaas Xaashi loo dhiibo Ugaasnimada.
<< Majority of Beesha Sade want this guy to become the new Ugaas. The odds are that he will become the new Ugaas. Even Ugaas Omar before he died said that he wanted his nephew to become the new ugaas.
