Madaxweynaha Soomaaliya Sheekh Shariif iyo wafdi uu hoggaaminayo oo u ambabaxay dalka Kenya
Arbaco, November 16, 2011 (HOL) — Madaxweynaha Soomaaliya, Sheekh Shariif Sheekh Axmed iyo wafdi uu hoggaaminayo ayaa goor-dhow ka duulay garoonka diyaaradaha ee Muqdisho, iyagoo kusii jeeda magaalada Nairobi ee xarunta dalka Kenya.
Sheekh Shariif iyo wafdigiisa ayaa lagu wadaa inay booqasho maalmo ah ku joogaan Kenya, iyadoo inta uu halkaas ku sugan yahayna la kulmi doona madaxda dalkaas si ay uga wadahadlaan xaaladda dalka Soomaaliya iyo ciidamada Kenya ee gobollada Koonfurta Soomaaliya ku sugan.
Madaxweynaha ayaa lagu wadaa in inta uu ku sugan yahay Nairobi uu sidoo kale la kulmo madaxweynaha dalka Uganda, Yoweri Museveni oo isaguna halkaas ku sugan, si ay uga wada-hadlaan xaaladda ammaan ee Soomaaliya, gaar ahaan Muqdsiho.
Mr. Museveni ayaa horay u sheegay inuu taageersan yahay howlgallada ay ciidamada Kenya kawadaan gudaha dalka Soomaaiya, kaddib kulan uu dalkiisa kula yeeshay wasiirka arrimaha dibadda ee Kenya Moses Wetang'ula.
Wasiirka gaaashaandhigga Soomaaliya, Xuseen Carab Ciise iyo wasiirka arrimaha gudaha iyo ammaanka Qaranka, C/samad Macallin Maxmauud ayaa kaga sii horreeya madaxweynaha magaalada Nairobi ee dalka Kenya.
Dhanka kale, Sheekh Shariif ayaa shalay la hadlya ciidamo ka tirsan DKMG ah ee Sooomaaliya oo tababar kusoo qaatay dalka Uganda, isagoo ugu baaqay ciidanka inay guntiga u xirtaan sidii ay ula dagaalami lahaayeen Al-shabaab.
Sidoo kale, madaxweynuhu wuxuu ciidamada ku boorriyay inay diinta islaamka ku dhaqmaan, ayna dib u dhigtaan hamigooda ah inay guursadaan, isagoo sheegay in guur uu u waajibayo markii ay dalka ka saaraan Al-shabaab waa sida uu hadalka u yiriye.
Ugu dambeyn, madaxweynuhu wuxuu ciidamadii uu la hadlay u sheegay inay heli doonaan xuquuqaadkooda oo dhan, iyadoo hadalka Sheekh Shariif uu imaanayo iyadoo aanay ciidamada DKMG ah qaadan wax mushaaraad ah muddo saddex bilood ah.
Ciidamadan ayaa la sheegay inay tababar kale oo lagu barayo sharciyada dalka ku qaadan doonaan xerada ciidamada ee Jasiira oo ahayd halkii uu madaxweynuhu shalay ugu jeediyay ciidamada dardaaranka.
Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya
.