CEELBARDE - (Afdheer) Warbixin aan kusoo ururinay wareysi aan la yeelanay Ugaas Haaruun Ugaas Dacar oo ku sugan degmada Ceelbarde ee gobolka Bakool ayuu kaga hadlay arrimo badan oo aan kusoo uruurinay sidan hoos ku qoran:
UGAAS HAARUUN: Waxaan joognaa magaalada Ceelbarde ee gobolka Bakool oo uu ka socdo kulan ay leeyihiin dadka deegaanku kulankan waxaa kasoo qeybgalay aniga, Ugaas Diiriye iyo Ugaas Xuseen waxaanan wadajoognaa hadda Ceelbarde.
Gobolka Bakool gaar ahaan degmooyinka Ceelbarde, Ato iyo Yeed waxaa ka da`ay roobab mahiigaan ah oo waaweyn kuwaasoo barwaaqo ka dhigay dhammaan deegaanada degmooyinkan miyi iyo magaalaba.
Degmooyinka 3-da ah maamulkoodu wuxuu hoos tagaa dowladda Soomaaliya si rasmi ah ayeyna u wada shaqeeyaan maamulada degmooyinkan ka jira iyo dowladda Kmg ah ee dalka Soomaaliya.
3-dan degmo ee aan kor kusoo sheegay waxaa loo tababaray ciidan tababarkoodii kusoo dhammeystay DOOLOW oo dib loogu soo celiyey deegaanadan iyagoo qalabeysan, ciidamadan lasoo siiyey tababarka cusub waxay wax weyn kusoo kordhiyeen muuqaalka iyo nabaddii horeba uga jirtey degmooyinkan.
Degmooyinkan waxaa ka jira maamullo wanaagsan oo ay dadka deegaanku sameysteen dowladda Soomaaliyana magacowday oo ay gacan ka hela oday dhaqamedyada iyo shacabka deegaanaddan.
Illaah baa mahad oo dhan u sugnaatay waxaan joognaa deegaano barwaaqo ah, nabad ah, lagana wado horumar aad ah.
Saddexda degmo ee gobolka Bakool ee koonfurta dalka Soomaaliya waxaa deris la ah saddex degmo oo ku yaal degmooyinkaas degta kale ee ay xuduudda dhanka Itoobiya ah. Degmooyinka gobolka bakool waxay xiriir sokeeye ka sakow xiriir iskaashi leeyihiin degmooyinka dhanka Itoobiya si ay iskaga kaashadaan nabadda, ganacsiga, waxbarashada, caafimaadka iwm.
Waxaanu dooneynaa inaan sii xoojinno wadashaqeynta iyo isku xirnaanshaha saddexdan degmo waxaanan rajynaynaa inay degmooyinkan yeeshaan isku tashi.
Wareysiga Ugaas Haaruun Ugaas Dacar waxaan kusoo koobnay intaas, waxaan idiin soo gudbin doonaa haddii rabbi idmo warbixinno.
Ceelbarde
afdheer.com
info@afdheer.com
16, November 2011
