Kulan ku saabsan hormarinta waxbarshada caruurta ku nool xeryaha barakacayaasha gobolka Mudug ayaa maanta lagu qabtay magaalada Gaalkacyo ee xarunta gobolka Mudug,
Kulankan oo ay soo qaban qaabisay xarunta hormarinta waxbarshada iyo nabadda (GECPD) ee Gaalkacyo ayaa waxaa ka soo qayb galay marti sharaf kala duwan oo ay ka mid ahaayen maamulka gobolka Mudug, hay’adaha deeqaha baxsha iyo qaybha bulshada gobolka Mudug ,
Waxaa ugu horaytii lagu soo bandhigay furitaankii xafladan majaajilooyin iyo heeso wadani ah oo ay ku luuqeenayeen qaar ka mid ah caruurta barakacayaasha ah ee ku nool xeryaha qaxootiga ee ku yaala magaalada Gaalkacyo,waxaana dhamaan heesihii ay ku luuqeeyen ku saabsanaayen xaquuqda caruurta iyo nabadda.
Gudoomiye ku xigeenka Gobolka Mudug Axmed Muuse Nuur oo munaasabadan goob joog ka ahaa ayaa ugu horayn u mahad celiyay Xarunta waxbarshada iyo hormarinta nabada ee magaalada Gaalkacyo waxaana uu ku tilmaamay hooyada waxbarshada gobolka Mudug maadaama ay soo sareen caruur aad u tiro badan oo aan awoodin qarashaadkii waxbarshada ay ku bixin lahaayeen.
Axmed Muuse Nuur ayaa dhanka kale ka hadlay xaquuqda ay leeyihiin caruurta soo barkacay ee ku nool magaalada Gaalkacyo isagoo sheegay in loo baahan yahay ilaalinta iyo dhawrista caruurta barakacayasha ah isla markaana loo abuuro waxbarsho si musataqbalka ay u intifaacsadaan.
Xaawo Yuusuf Axmed oo ka mid ah shaqalaha xarunta GECPD Gaalkacayo ayaa sheegtay in xaruntoodu ay gacanta ku hayso dhamaan caruurta ku nool xeryaha barakacayaasha ah ee magaalada Gaalkacayo oo ayna ka caawiyaan waxbarshada caruurta iyo quudintooda .
Xaawo Yuusuf waxaa kaloo ay ka hadshay dhibaatooyinka haysta caruurta da’doodu ka yar tahay 5 sano ee ku nool xeryaha barakacayaasha Gaalkacayo waxaana ay tilmaamtay in aysan jirin cid u damqata dhibaatooyinka ay la kulmaan caruurtaas oo ay ugu weyntahay waxbarsho la’aanta iyo amni xumada.
Sidoo kale waxaa xaflada hadalo kooban ka soo jeediyay qaar ka mid ah masuuliyiinta waxbarshada ee gobolka mudug waxaana ay hanbalyo iyo bogaadin u direen xarunta GECPD Gaalkacyo oo isku xilqaantay wax barista caruurta ku nool kaamamka barakacayasha ee ku yaala Gaalkacyo .
Ugu danbayntii xarunta GECPD ayaa soo bandhigtay dadaalkeeda ku aadan waxbarista caruurta, wuxuuna kulankaasi kusoo idlaaday jewi degen iyadoo dhamaan dadkii kasoo qayb galay ay u riyaaqeen arimihii looga hadlay.
Axmed Maxamed Cali [Caano-Geel]
Horseed Media
Gaalkacyo-Puntland
They are everywhere in Puntland. You will even find them in the most remote, excluded areas in Puntland.
