Ciidamado ka tirsan ilaalada xeebaha iyo la dagaalanka Burcad-badeeda ee Puntland oo dhowaan tababar loo soo xiray ayaa la geeyey degmada Qaw 30km dhinaca qorax u dhaca kaga beegan magaalada Boosaaso.
Ciidamadan oo in mudo ah uu tababar uga socdey xero ku taala aga gaarka Airport-ka magaalada Boosaaso ayaa ah kuwo si heer sare ah loo qalabeeyey waxayna xero ciidan oo hor leh ka samaysteen degmada Qow.
Xiriiriyaha ciidamada ilaalada xeebaha iyo la dagaalanka Burcad-badeeda iyo dowlada Puntland Cabdirisaaq Maxamed Maxamuud (Xidig) oo maanta xafiiskiisa Saxaafadda ku qaabilay ayaa ka warbixiyey ciidamada degmada Qaw la geeyey iyo ujeeda ay halkaas u tageen.
Wuxuuna sheegay in ciidamadaasi ay bilaabayaan howgalo ka dhan ah Burcad-badeeda iyo dadka wax tahriibiya, howshaas oo uu tilmaamay inay tahay middii markii horeba loo dhisay inay qabtaan.
Mr Xidig ayaa dhinaca kale sheegay in Bulshada deegaanka Qaw ay ciidamadan si weyn usoo dhoweeyeen maadaama uu deegaankaasi hada saldhig u noqday kooxo badan oo Burcad-badeed ah oo laga soo saaray deegaanadii ay horay ugu xooganaayeen.
Mas’uulkan ayaa mar Horseed Media ay weydiisey su’aal ahayd waxa ka jira in ujeedada ciidamadan loo tabaray ay tahay mid dano kale laga leeyahay sida howlo la xiriira shidaal qodista uu ku jaawaabey in warkaasi uu yahay mid aan jirin ciidamadanina ay qayb ka yihiin ciidamada dowlada Puntland.
Cabdirisaaq Maxamed Maxamuud (Xidig) ayaa ugu danbeyntii sheegay in ciidamada Mariinisku ay kaalin muuqata ka qaateen howlihii biyo dhaaminta xiliyadii ay abaaruhu jireen, deminta dabkii suuqa magaalada Boosaaso gubey, sugidda ammaanka magaalada Garoowe xiligii uu shirka wadatashigu socdey, iyo soo dhoweynta wefdigii Ra’iisul wasaaraha Soomaaliya xiligii a magaalada Boosaaso kusoo jeedeen.
Howgalkan ayaa ah kii ugu horeeyey ee noociisa ah ee ay ciidamada ilaalada xeebaha iyo la dagaalanka Burcad-badeed ee Puntland sameeyeen tan iyo markii la asaasay, waxaana dhowaan la filayaa inay xarumo ka samaystaan 6-goobood oo ay kamid yihiin degmooyinka Eyl iyo Baargaal.
