Khaatumo means business
Wafti Balaadhan oo ka Socda Maamulka Khaatumo State oo ku Sii Jeeda Dalka Norway oo ay Casuumaad ka Heleen.
Wufuud Balaadhan oo uu Horkacayo Raysal wasaarihii hore ee dalka Soomaaliya Mudane Cali Khaliif Galaydh ayaa ku sii jeeda dalka Norway. Waftiga Khaatumo State waxaa ka mid ah Wasiirka Xidhiidhka Caalamiga ah iyo Jaaliyadaha Pro: Xuseen Saleebaan X, Axmed iyo xubno kale. Wufuudan oo ka ambabaxday magaalada Adis Ababa ee xarunta dalka Ethiopia ayaa casuumaad rasmi ah ka helay wasaarada arimaha debeda ee dalkaasi Norway.
Dawladda Norway iyo maamulka Soomaaliyeed ee Khaatumo State ayaa lagu wadaa inay isla lafa guraan arimo badan oo khuseeya labada dhinac, sida arimaha nabadgelyada , Xidhiidhka caalamiga ah iyo deeqaha ay xaqa u lee yihiin shacabka Khaatumo ee Soomaaliyeed.
Sida uu noo xaqiijiyey sarkaal sare oo ka tirsan wasaarada xidhiidhka caalamiga ah ee maamulka Khaatumo State xubnahan ayaa casuumaad rasmi ah ka helay dawladda Norway oo ka mid ah dawladdaha deeqaha ugu badan siiya dalka Soomaaliya.
Dawladda Norway ayaa ka mid dawladaha ugu badan ee hada daneeya arimaha Soomaaliya ayadoo xubin ka ah kooxda xidhiidhka Soomaaliya ee loo yaqaano,{Contact Group}. Sidoo kale hay’ada keliya ee ka hawlga deeganada Khaatumo State Of Somalia ayaa ah hayda loo yaqaano Norwegian People’s Aid{NPA}. Taasoo si xawli ah uga shaqaysa deeganada Khaatumo kana hirgelisay ceelal biyoodyo fara badan iyo xarumo caafimaad oo dhamaadtood ku yaala deeganada maamulka Khaatumo ee Soomaaliyeed.
Safarkan ayaa noqonaya kii ugu horeeyey ee maamulka Khaatumo State si Rasmi ah ugu tago dalalka reer galbeedka, kuwaasoo hada daneynaya in ay iskaashi la yeeshaan maamulka cusub ee Khaatumo State Of Somalia.
Horufadhi News Desk.
