Shirwaynaha 2-aad ee Dastuurka PL 15-ka February lagu qabayo

[FBISOMALIA]

Garowe, February, 12 - Dawladda Puntland ayaa 15-ka bishaan February u cillaamisay in Garowe lagu qabanayo shirwaynaha heerka qaran ee Dastuurka, kaasi oo loogu magac-daray Garowe 2.

Wasiiru-dawlaha dastuurka iyo arrimaha federaalka Puntland Dr C/xassan Jimcaale oo waraysi siiyay radio Daljir ayaa si qeexan arrintaasi uga waramay, waxaana uu sheegay in shirkaan lagu qabanayo Garowe uu dabo-socdo shirkii hore ee ku saabsanaa Dastuurka kaasi oo Garowe lagu qabtay 21-kii illaa 24kii bishii December dabayaaqadii sanadkii tagay ee 2011.

Wasiirk ayaa ku tilmaamay ajandayaasha looga hadli-doono shirka Garowe inay ka mid-yihiin nooca nidaamka federaaliisimka ee la qaadanayo, sidii xukunka dawladda federaalka loo baahin-lahaa, sidii loo dhisi-lahaa hay’adaha dawladda federaalka ee Soomaaliya, iyo tirada aqalka sare ee baarlamaanka Soomaaliya.

Wasiiru-dawlaha dastuurka iyo arrimaha federaalka dawladda Puntland Dr C/xassan Jimcaale ayaa sheegay in shirkaan loogu magac-daray Garowe 2 ay kasoo qayb-qaadan doonaan madaxda dawladda dhexe, baarlamaanka dawladda dhexe, Ahlusuna, iyo Gal-mudug, waxaana imaan-doona beesha caalamka oo ay ka socdaan UNPOS, UNKA, iyo madaxda dawlado danneeya arrimaha Soomaaliya.

Diiwaanka Wararka
Daljir Garowe.