President Siilanyo visits the Family Omaar In Hargeysa

[Khalid Ali]

Madaxwayne Siilaanyo Iyo Marwadiisa Oo Caawa Booqday Xaaska Marxuum Cabdilaahi Oomaar Oo Ahaa Aabaha Wasiirkii Arimaha Dibada Ee Somaliya

Hargeysa (Ramaas) May 5,2012 – Madaxwaynaha Somaliland Md Axmed Maxamed Maxamuud (Siilaanyo) ayaa socdaalk kedis ah ku tagay guriga ay dagan yahay xaaska Marxuum Cabdilaahi Oomaar oo dhanka waqooyi kaga beegan aqalka Madaxtooyadda.

Socdaalka Madaxwaynuhu ku tagay guriga Marxuum Cabdilaahi Oomaar, oo ahaa Aabaha Wasiirkii hore ee wasaarada arimaha dibada ee dawlada ku meel-gaadhka ah ee Somaliya Maxamed Cabdilaahi Oomaar, ayaa waxa ku wehelinayey Marwada koowaad Aamina Xaaji Maxamuud Jirde iyo xubno wasiiro ah.

Madaxwaynaha iyo Xubnaha la socday oo socdaalkan ay ku booqdeen Xaaskii Alle ha u naxariistee Cabdilaahi Oomaar oo ahaa mid aanay cidna ka war-qabin, isla-markaana aan ujeedadiisa la ogeyn, ayaa mar dambe lagu baraarugay in Madaxwaynuhu Madaxtooyada ka baxay.

Ilaa hadda si rasmi ah looma oga ujeedada rasmiga ah ee Madaxwaynuhu u tagay guriga Marxuum Cabdilaahi Oomaar, balse wararka qaarkood ayaa sheegaya in Madaxwaynuhu salaam ugu tagay xaaska Marxuum Cabdilaahi Oomaar, oo uu si caadi ah ugu booqday guriga isaga oo ka faa’ideysanaya Jimcaha maanta oo shaqooyinku yar yihiin.