Port Louis (RBC) Dowladda Mauritius ayaa Jimcihii shaley heshiis la gaartay Maamulada Somaliland iyo Puntland heshiiskan oo ku aadan siddii loo maxkamadeyn lahaa burcad-badeeda Soomaalida ee weerarada is-dabajooga ah kuhaya gaadid badeedka ganacsiga ukala goosha aduunka oo dhan.
Ra’iisal wasaaraha dalka Jaziirada leh Navinchandra Ramgoolam ayaa sheegay in dalkiisa uu baahan yahay in uu door ka cayaaro, siddii looga guulsan lahaa kooxaha burcad-badeeda Soomaalida kuwaas oo qalqal ku keenay arrimaha nabadgalyada, Kalluumeesiga iyo Dalxiiska.
Wakiilo ka socday Puntland iyo Somaliland oo goob joog ka ahaan heshiiskan oo ka dhacay dalka Mauritius ayaa soo dhaweyay qorshaha, waxa ay ogolaadeyn in dalkaas uu maxkadeeyo uuna xiro kooxaha looga shakisan yahay burcad-badeednimo.
Howshan waxa qeyb ka ah in burcad-badeeda lagu xiro laguna maxkamadeeyo deeganada Puntland iyo Somaliland, waxana lagu wadaa in ay bilaabmaan bisha June ee sanadkan.
Maraakiibta caalamiga ee ka hortaga weerarada kooxaha burcad-badeeda Soomaalida ayaa hadda bilaabay in ay gacanta ugaliyaan maamulada ka dhisan Soomaaliya kooxaha burcad-badeeda Soomaalida, in kastoo nidaamyadii sharciga uusan ka jirin Soomaaliya, sidoo kale waxa laga cabsi qabaa in burcad-badeeda ay raadsadaan magangalyo marka lageeyo dalalka ay maraakiibta dagaal ka joogaan xeebaha Soomaaliya.
Dhowr qof oo looga shakiyay burcad-badeednim oo ay qabteyn maraakiibta dagaalka ayaa la iska siidaayay, markii la waayay dal ama meel lagu xiro ama lagu maxkamadeeyo.
Mauritius waxa ay ka mid tahay dhowr wadan oo ku yaala bariga Africa iyo badweynta India, kuwaas oo loogu tallagalay in lagu maxkadeeyo burcad-badeeda, maxaa yeelay Soomaaliya hadda nidaamkii maxkamadaha kama jiro.
Mauritius waxa dhinaca ammaanka lagu siiyay 3 million euros ($3.82 million) bsihii July taas oo ka timid ururka midowga Yurub waxa loogu tallagalay in lagu maxkadeeyo ama lagu xiro kooxaha looga shakisan yahay burcad-badeeda.
RBC Radio
——————-
Xafiifka Wararka Nairobi
