Madaxweynaha Somaliland Oo Ku Bogaadiyey Orod-yahanka Mo Farax Guulaha Uu Ka Soo Hooyey Olympic-da Guusha Mo Farah, Waa Guul U Soo Hoyatay Shacaabka Somaliland Iyo Dalka Britain-ba.
(Hadhwanaagnews) Saturday, August 11, 2012
(HWN):Madaxweynaha Somaliland Md. Axmedd Maxamed Maxamuud (Siilaanyo) ayaa ku bogaadiyey Orodyahanka caalamiga ah ee reer Somaliland Mo Farah guusha uu mar labaad ka soo hooyey tartanka Ciyaaraha Olympic-da ee ka socda dalka
Hargeysa(HWN):Madaxweynaha Somaliland Md. Axmedd Maxamed Maxamuud (Siilaanyo) ayaa ku bogaadiyey Orodyahanka caalamiga ah ee reer Somaliland Mo Farah guusha uu mar labaad ka soo hooyey tartanka Ciyaaraha Olympic-da ee ka socda dalka Ingiriiska, kadib markii uu caawa guulaystay tartankii Orodka 5000m.
Madaxweynuhu waxa uu sidaa ku sheegay Warsaxafadeed uu ku saxeexan-yahay Afhayeenka Madaxtooyada Somaliland Cabdilaahi Maxamed Daahir (Cukuse) oo nuqul ka mid ahi soo gaadhay Xafiiska Shabakada Wararka ee Hadhwanaagnews ee Magaalada Hargeysa.
Warsaxafadeedkii oo dhameystirana waxa uu u dhignaa sidan:
Madaxweynaha Somaliland Md. Axmed Maxamed Maxamuud (Siilaanyo) ayaa caawa dhambaal Hambalyo iyo Taageero iskugu jira u diray Orodyahanka caalamiga ah ee reer Somaliland Mo Farah isla markaana haysta jinsiyada Ingiriiska, kaasi oo ku guulaystay biladdii labaad ee dabab ah. Ka dib markii caawa ku guulaystay tartankii Orodka 5000m ee ciyaaraha Olombiga ee ka socda magaaladda London.
Madaxweynaha Somaliland Md. Axmed Maxamed Maxamuud waxa uu ku farxay isla markaana ku bogaadiyay halyaygan weyn ee wacdaraha ka muujiyay fagaareyaasha ciyaaraha adduunka. Waxaanu Madaxweynuhu sheegay inay guusha Mo Farah tahay guul u soo hoyatay shucuubta Somaliland iyo dalka Britain-ba.
Madaxweynuhu waxa uu ku booriyay Orod-yahan Maxamed Faarax oo dhawaana ku guulaystay tartankii 10000m inuu sii wado dedaalka weyn ee uu ka sameeyay dunida ciyaaraha.
Madaxwene Axmed Maxamed Maxamuud waxa uu dhalinyaradda dalka ku guubaabiyay inay ku daydaan Mo Faarax oo ay awooda saaraan inay heer wanaagsan ka gaadhaan noocyada kala duwan ee ciyaaraha. Madaxweynuhu wuxuu halyaygan ku sifeeyay tusaale wanaagsan u yahay jiilka cusub ee Somaliland.
Madaxweynuhu waxa uu ugu dambayn ku bogaadiyay dawladda Ingiriiska ee uu magaceeda ku ordayo Mo Farah, waxaanu u rajeeyay inay guulo waaweyn ka gaadhaan tartanka Olomiga adduunka ee 2012 oo ka socda Magaalada London.
Mustafe-Jannaale
Hadhwanaagnews.com/Office
Hargeysa/Somaliland
