September 20th, 2012 Comments Off
Hargeysa (Somaliland.Org)-Afar Urur siyaasadeed iyo Xisbiga UCID, ayaa maanta shir albaabaddu u xidhan yahay oo ay ka yeesheen inay qaraar ka soo saaraan mawduuca la xidhiidha sharciyada labada xil ee Guddoomiyaha Golaha Wakiiladda ahna Guddoomiyaha urur-siyaasadeedka WADDANI Md. C/Raxmaan Maxamed Cabdilaahi (Cirro) oo todobaadyadii u dambeeyay xisbiga UCID daba ka riixayay sidii Guddoomiyaha wakiiladdu labadiisa xil mid uga tanaasuli lahaa.
Shirkan oo ku qabsoomay xarunta Ururka XAQSOOR ee magaaladda Hargeysa, waxa ka soo qeyb galay Urur-siyaasadeedyadda kala ah XAQSOOR,UMMADDA, RAYS, WADANI iyo xisbiga UCID. waxaana shirkan oo uu martigeliyay Guddoomiyaha Ururka XAQSOOR Md. Xasan Ciise Jaamac.
Waxa kale oo xubnihii ka qeyb galay ka mid ahaa Guddoomiyaha Ururka RAYS Md. Xasan Gaafaadhi, Guddoomiye Ku xigeenka koowaad ee WADDANI Md. Axmed Muumin Seed iyo lix sarkaal oo kale oo ka tirsan ururkaasi. Halka xisbiga UCID uu ka socday Guddoomiye Ku xigeenka sadexaad Md. Cali Maxamed Yuusuf (Cali-Guray), ururka UMMADDA waxa shirkaasi uga soo qeyb galay Guddoomiye Ku xigeenka labaad.
Siday ilo xog ogaal ahi noo xaqiijiyeen waxa Masuuliyiintani ay dood dheer ka yeesheen waxa sharcigu ka qabo labada xil ee Guddoomiyaha Golaha Wakiiladda ahna Hoggaamiyaha urur siyaasadeedka WADDANI. Waxaana shirkaasi la isla qaatay in aan wax sharci ah oo u diidaya inuu labadaasi xil isku hayaa jirin, sidaasi darteedna cidii muduci ku ahi ay dacwad geysato maxkamada sare ee dalka.
Waxa kale oo qodobadii la isku raacay ka mid ahaa inaan wakhti la iskaga lumin arrintaasi oo ay tilmaameen in mawduuc xasaasi ah laga dhigay. Xisbiga UCID ayaa ku fashilmay inay ururadda kale taageero uga helaan in la diido labada mansab ee uu isku hayo Guddoomiyaha Wakiiladdu.
Somaliland.Org/Hargeysa
