SOOL Region Health Initiative: Puntland Minister of Health comes for Inspection and working visit
Wasiirka Caafimaadka Puntland Oo Markii u horeysay Kormeer Shaqo ku tagay Gobalka Sool (Warbixin iyo Sawiro)
Posted by Pi on November 6th, 2012
Garowe: Degmada Boocame ee Gobalka Sool ayaa waxaa maalintii shalay kormeer shaqo ku tagay Wafti ka tirsan Xukuumada Puntland oo uu hogaaminayay Wasiirka Wasaaradda Caafimaadka Dr. Cali C/laahi Warsame. Waftigan waxaa ka mid ahaa Wasiirka Hawlaha guud iyo Gaadiidka Daahir Xaaji Khaliif iyo Wasiir ku xigeenka Deegaanka, Duurjoogta, Daaqa iyo Dalxiiska Burhaan Cilmi Filiq.
Gudoomiyaha Gobalka Sool, Duqa Degmada Laascaanood, Odayaal iyo waxgarad ayaa kusoo dhaweeyey waftiga Degmada Boocame, Tukaraq, Buurawadal iyo Falayryaale oo ay waftigu kormeer shaqo ku mareen shalay. Waftigu waxay ku hormareen Degmada Boocame oo ay soo dhawayn kala kulmeen maamulka iyo waxgaradka Degmadaas iyadoo ay kulamo la qaateen waftigu waxgaradka, Odayaasha iyo Maamulka Degmada Boocame iyo kan Gobalka Sool.
Kormeerka Waftiga ayaa ku aaday xili uu Degmada Boocame iyo Tuulooyinka hoos taga uu ka soconayo Ololaha Talaalka Maalmaha Caafimaadka Caruurta iyo Hooyada Dhaqmaadka ah (Child Health days), waxaana waftiga Wasiirka Caafimaadku kormeereen sida ay kooxaha caafimaadku u wadaan Talaalka waxayna meelaha ay booqdeen ee kooxaha talaalku ololaha ka wadeen ay wasiiradu dadka ku dhiirigaliyeen inay caruurta wada talaalaan si looga hortago xanuunada laga hortagayo isla markaasna ay caruuruhu qaataan nafaqooyinka la socda talaalka iyo hooyooyinka oo ay ku dhiirigaliyeen inay qaataan talaalka u gaarka ah.
Kulan balaaran oo ay waftigu kula qaateen Degmada Boocame Maamulka, Odayaasha iyo Waxgaradka ayaa dadka deegaanku waxay wasiirada uga warameen xaaladaha caafimaad ee ka jira Gobalka Sool iyo guud ahaan xaaladaha kale ee Gobalkaas iyadoo ay dowladda ka codsadeen in wax laga qabto arimaha bulshada oo Caafimaadka, Waxbarashada iyo Biyuhu ay ugu horeeyaan.
Wasiirka Caafimaadka Puntland Dr. Cali C/laahi Warsame ayaa Maamulka Gobalka Sool, Maamulka Degmada Boocame, Odayaasha iyo waxgaradka Gobalkaas waxa u uu sheegay in dowladda Puntland golaheedu wasiiradu ay ugu yimaadeen kormeer hawleed oo ay ugu kuur galayaan xaalada dhabta ah ee ka jirta Gobalka iyo kormeerida hawlaha Caafimaadka oo uu wasiirku sheegay in wasaaraddiisu ay ka wado Gobalka Sool, Wasiirka Caafimaadku wuxuu u sheegay Waxgaradka iyo Maamulka Gobalka Sool in wasaaradda caafimaadku ay ka shaqeyso guud ahaan Gobalka Sool xitaa wasiirku waxa uu sheegay inay mushahaaraadka iyo Daawada siiyaan Isbitaalka Degmada Laascaanood oo gacanta dowladda ka maqan sidaasna waxa uu wasiirku sheegay inay u yeeleen in dadkii reer Puntland yihiin dadka reer Laascaanood oo shaqaalaha Isbitaalka ka shaqeynaya ay yihiin muwaadiniintii ayna xaq u leeyihiin in mushaarka loo wado iyadoo Laascaanood ay gacanta dowladda ka maqan tahay.
Wasiirka Caafimaadka Puntland Dr. Cali C/laahi Warsame waxa uu sidoo kale u sheegay waxgaradka Gobalka Sool in koox dhakhaatiir ah oo Wasaaradda Caafimaadka ka tirsan ay hawlo caafimaad oo baaritaan iyo daaweyn ah ay ka wadaan Degmada Boocame, Tukaraq, Falayryaale iyo Buurawadal.
Wasiirada kale ee la socday Wasiirka Caafimaadka Puntland ayaa iyaguna bulshada u sheegay in xukuumadda Puntland ee jirta ay diyaar u tahay inay dadkeeda xaaladaha nololeed ee ay ku nool yihiin ay u kuurgasho, booqashadooduna ay tahay mid uu wax qabad balaaran uu ka danbeeyo.
Wasiirka Caafiamadka Puntland Dr. Cali C/laahi Warsame ayaa Boocame iyo Tukaraq Xarumaha Caafimaadka ee hooyada iyo Dhalaanka wax auu dhagax dhigay Dhismayaal lagu siyaadinayo oo baahi weyn loo qabo si loo balaarsho baahida caafimaadka aasaasiga ah.
Booqashada Waftiga ee Gobalka Sool oo qaadatey hal maalin ayaa Waftigu waxay habeenimadii xalay dib ugu soo noqdeen magaalada Garowe ee caasiamda Puntland iaydoo waftigu ay ka sheegeen Deegaanadii ay soo booqdeen nabad iyo degenaansho, waxayna ku aadeen xili barwaaqo ah oo dhulku cagaar yahay xooluhuna ay barqo dharag yihiin oo ay hareeraha wadadda ay daaqayaan. Kormeerkan waxa uu sidoo kale kusoo aadayaa iyadoo ay Wasaaradda Caafimaadku ka wado Gobalka Sool Ololaha Talaalka waxayna waftigu intii ay booqanayeen Degmada Boocame iyo Tuulooyinka hoosta ay la kulmayeen shaqaalaha Caafimaadka ee talaalka ka wada Gobalka Sool.
Sawirada hoos ka daawo
Waxaa nasoo gaarsiisay Qoraalkan iyo Sawiradda
Wasaaradda Caafimaadka
C/wali Maxamed Aadan (Sanka)
years and more.