-------
Mudaaharaad ballaaran oo looga soo horjeedo Faroole oo ka dhacay magaalada Bosaso
Waxaa maanta ka socda magaalada Bosaso mudaaharaad ballaaran oo ay ka qaybqaateen dhalinyaro badan, mudaaraadayaasha ayaa wata boorar ay soo daabacdeen oo ay ku sawiran yihiin sawiro looga soo horjeedo maamulka Madaxweyne Cabdirxmaan Faroole, waxaana ku qornaa No Faroole,, Faroole Doni Mayno, waxaana ay ku dhawaaqayaan halkudhigyo looga soo horjeedo dowladda isla markaana looga cabanayo dhibaatooyinka dhaqaale xumo iyo siyaasadeed ee dalka ka taagan.
Waa mudaaharaadkii labaad ee ka dhaca magaalada Bosaso muddo saddex maalmood gudaheed ah, waxaana uu imaanaya xili Wasiirka Amniga Puntland Khaliif Ciise Mudan uu sheegay in ay gacan bir ah ku qabanayaan dadka mudaaharaadaya, siyaasiyiinta aan maamulka hadda ka tirsaneyn ee ilaalada watana la xirayo, haddii ay ka dhega adaygaan ama is difaacaana la laynayo sida wasiirku hadalka u dhigay.
Dadka mudaaharaadka ka qaybqaadanayey ayaa markii ay yimaadeen Igoyska gaaca waxay dhulka soo dhigeen Boodhweyn oo uu ku sawirnaa Guddoomiyaha Xisbiga Horsed Cabdiraxmaan Maxamed Faroole, waxaana ay ku dul qoreen No Farole.
Banaanbaxa looga soo horjeedo nidaamka uu wado Madaxweyne Cabdiraxmaan Faroole ayaa bilowdey goor hore uu subaxnimo ah iyada oo ay tahay Jimce dhaq-dhaqaaqa gawaariduna uu ahaa mid yar, Ciidamada amaanka ayaa mar danbe yimid bartamaha magaalada iyaga oo isku dayey in ay hakiyaan dhalinta mudaaharaadka ka qayqaadaneysey laakiin waa u suurta geli weydey.
Mudaaharaadkan ayaa imaanaya iyada oo labadii maalmood ee u dabeysey doonyo shidaal ka keeney dalka Yemen ay ku xaniban yihiin dekadda Bosaso kadib markii Dowladdu mamnuuc ka dhigtey in shidaal laga keeno dalka Yemen, waxaan fuustada Naaftada ah ay gaartey 200$ halka ay markii hore ka ahayd 140-150$.
Qaar ka mid ah Hay’adaha ajaanibta oo loo digey
Dhanka kale galabnimadii shalay (Khamiis) waxaa digniin maamulka Puntland siiyey qaar kamid ah hay’adaha degan xaafada Laanta Hawada, waxaana qaarkood amar lagu siiyey in ay isaga baxaan guri ay muddo dheer ka kireysteen Wasiirkii hore ee Amniga Puntland Gen.Cabdullaahi Siciid Samanter, waxaa digniintaani saameysey hay’addo kale oo deganaa guryaha dhinacyada ku haya kuwaas oo saqaalihihii joogey habeenkii xalay ay u qaxeen kuna hoydeen guriga WFP.
Lama oga digniintaani in ay la xiriirto digniintii dhawaan ka soo baxdey Wasiirka Amniga ee uu ku hanjabey in ay layn doonaan cid kasta oo ka hortimaada.
http://horseedmedia.net/2013/02/08/muda ... da-bosaso/