Odayaal ka soo jeeda beelaha Sade, Biyamaal, beesha Cowrmale iyo Gaaljecel ayaa shirka isaga baxay, iyadoo shirka uu galay xaalad buuq ah, kadib markii ergadii ugu badneyd shirka ay qaateen beel kaliya.
Nabadoon Cabdi Kheyr Xaaji Ismaaciil ayaa u sheegay warbaahinta Muqdisho in beel kaliya ay noqdeen kuwo ugu badan ee qaatay ergada, isla markaana beelihii kale ay u qalmi waayeen sadka laga siiyay ergada.
Wararka ayaa sheegaya in odayaasha shirka isaga baxay ee beelaha ka soo jeeda ay maanta ku yeelanayaan Kismaayo kulan ay ku qaadacayaan shirweynaha, iyadoo khilaafka shirka Kismaayo uu cirka isku sii shareerayo.
Maalmihii u dambeeyay ayaa waxaa shirka Kismaayo ka taagnaa khilaaf iyo is qab qabsi, waxaana isa soo taraya siyaasiyiinta iyo waxgaradka ka soo horjeeday shirkan oo qaarkood ku tilmaamay mid aan loo dhameyn oo hal dhinac un ka socda.
Dowladda Soomaaliya ayaa horay u cadeysay mowqifkeeda, iyadoo diiday wax kasta oo ka soo baxa shirkaas, inkastoo Maamulka KMG ee Kismaayo uu sheegay in shirka ay sii wadayaan ilaa ay ka dhisayaan maamul goboleedka Jubaland.
