Xukuumadda oo sheegtay Ciidamada Dowladda inay bil kasta u baahan yihiin toddobo milyan oo dollar
July 4, 2015 // admin1 // Warka
Wasiirka Wasaaradda Maaliyadda Somaliya, Maxamed Aadan Ibraahim (Fargeeti), ayaa sheegay Ciidamada Qalabka Sida Somaliya inay bil kasta u baahan yihiin lacag dhan toddobo milyan oo dollarka Mareykanka ah.
Wasiirka, ayaa tilmaamay in ilaha ugu muhiimsan ee Dowladdu wax ka hesho ay yihiin Dekeda iyo Garoonka Muqdisho, oo bil kasta soo xareeya isku celcelis lacag dhan toban milyan oo dollar, sida uu yiri.
Dakhliga anaga na soo galla hadda, waxaa ugu weyn waa Dekeda iyo Garoonka. Dakhliga na soo galo marka leesku celceliyo 10 milyan ayuu gaaraa bishii. Tobankaas milyan waxaan ku wadnaa Dowladdii dhan.” Ayuu yiri Wasiirka Maaliyadda Somaliya.
Waxa kaloo uu yiri “Ciidamada keligood ayaa waxay u baahan yihiin bishii toddobo milyan oo dollar, haddii leesku geeyo hawlgaladooda, mushaaraadkooda iyo raashiinkooda. Saddexda milyan soo hartay Dowlad laguma wadi karo, Wasaaradihii inay shaqeeyan ayaa la rabaa, Xukuumadda inay shaqayso ayaa la rabaa, Maamulaa dhismaaya in laga shaqaysiiyaa la rabaa, xaalado deg deg ah ayaa soo baxaaya. Marka waxaas dhan waxay u baahan yihiin in Dowladda ay kaafiso.”
Isagoo hadalkiisa sii wata, ayuu yiri “Marka kuma filna dakhligaasi in mushaaraadka dhan boqolkiiba boqol (100%) inta la bixiyo, Dowladiina ay shaqayso, marka taas waxay keenaysaa in wax kasta la beeqaamiyo. Waxyaabaha ugu waaweyn xoogga aan saarnay waxaa ka mid ahayd in la bixiyo raashiinka oo kale, aysan raashiinka ka go’in Ciidamada, isla-markaana mushaaraadka qaarkood la bixiyo.”
Maxamed Aadan Ibraahim oo la hadlay laanta afka Somaliga ee VOA, ayaa xusay bishii January inay bixiyen laba bilood, oo ay horey u lahaayen Ciidamada Dowladda, halka sanadkana ay bixiyen hal bil oo qura, mushaaraadkii ay Ciidamadu lahaayen.
Waxaa kaloo muhiim ah in la xuso sanadkan gudahiisa, January waxaan bixinay laba bilood oo mushaaraadkii ka baaqday Ciidamada Qalabka Sida oo sanadkii hore ah, oo November iyo December. Hal bil sanadkan waan bixinay.” Ayuu yiri Wasiir Fargeeti.
Dhaqaalo yarida soo wajahday Dowladda, ayuu tilmaamay inay ka dhalatay miisaaniyadda sanadkan ee Dowladda, oo ahayd kala bar in laga keeno dalka, inta kalana dibadda laga keeno. Waxaana sanadkan meesha ka baxday sida uu sheegay taageeradii ay dibadda ka heli jireen.
