Hawiye are Qaxooti in 2007(IDP) Internally Displaced People

[COSTA]

Dadkii ugu badnaa oo maanta ka qaxay magaalada Muqdisho


Khamiis, March 22, 2007(HOL): Dadkii ugu badnaa ayaa maanta waxay ka qaxeen magaalada Muqdisho tan iyo markii ay bilowdeen dagaallada u dhaxeeya Dowladda Federaalka iyo kooxaha ka soo horjeeda, waxaana maanta lagu arkayay waddooyinka Muqdisho dad u badan haween iyo caruur, kuwaasi oo qaarkood magaalada ay ka baxayaan , halka ay kuwa kalena ay u qaxayeen eheladooda oo ku sugan xaafado ka mid ah Magaalada Muqdisho.



Dadkani ka qaxay magaalada Muqdisho ayaa wuxuu qaxooda yimid kadib markii uu maalintii shalay ahayd ka dhacay magaalada Muqdisho dagaal aad u xooggan oo geystay khasaare dhimasho iyo dhaawac leh, iyadoo sidoo kalena uu qaxan yimid kadib markii xalay wareegto ka soo baxday Xafiiska Ra’iisal Wasaare Cali Maxamed Geedi lagu sheegay in dadka degan inta u dhaxeysa Kuliyaddii Jaalle Siyaad iyo Warshaddii Baastada ay halkaas isaga guuraan, si aysan dhibaato uga soo gaarin howlgallo ay dowladda halkaas ka sameyneyso.



Xaaladda ay ku sugan yihiin dadka rayidka ah ee Muqdisho ku sugan waa mid jaha wareer ah, mana yaqaanaan meel ay u cararaan, waxaadna arkeysaa dad ka soo qaxay xaafado uu saameeyay dagaalka Muqdisho, hadana u qaxaya xaafad kale oo aan waxba dhaamin.



Si kastaba arrintu ah ahaatee, Magaalada Muqdisho uma muuqato sidii ay mashquulka u ahayd oo ay u dad badneyd, waxaana lagu tilmaami karaa mid ay dadkeedu sii yaraanayaan sabab la xiriirta dagaalka ka dhex qarxay Dowladda Federaalka iyo Ciidamada Shisheeye ee ku dhinac ah iyo kooxaha hubeysan ee ka soo horjeeda oo iyagu maalmahan bilaabay in ay bannaanka isa soo dhigaan.



Salaad Iidow Xasan (Xiis), Hiiraan Online

http://www.hiiraan.com/news/2007/mar/wa ... 22-951.htm