Wafdigii Dowladda iyo Saraakiisha Beesha Mareexaan oo maanta

[Hiiraan boy]

Wafdigii Dowladda Federaalka Soomaaliya iyo Saraakiisha Beesha Mareexaan oo maanta wadahadalo uga furmaya Magaalada Kismaayo
Iyadoo xalay wada hadalo hoose dhex maray Wafdigii Dowladda Federaalka Soomaaliya ee uu hoggaaminayay Wasiirka Arrimaha Gudaha Maxamed Maxamud Guuleed (Gacama Dheere) ayna ka mid ahaayeen xubno labada gole ka tirsan iyo Maamulka Magaalada Kismaayo iyo xubno hordhac ah oo ka socday beesha Mareexaan ayaa saaka lagu wadaa in xubnaha Wafdiga wada hadalo la furtaan Saraakiisha iyo waxgaradka Beesha Mareexaan.

Wararka ayaa sheegaya in xubnaha Wafdiga Dowladda Soomaaliya ay doonayaan inay xaliyaan khilaafka gacan ka hadalka ee dhawaan dhex maray ciidamadii uu watay Taliyaha Guutada koowaad Dowladda Soomaaliya C/risaaq Afgaduud iyo Ciidamo ka soo jeeday Beesha Mareexaan.

Wasiirka Arrimaha Gudaha waxaa horyaala caqabado fara badan oo dadka degaanka ka sheegteen Afgaduud iyo Ciidamada uu wato, sidoo kale Wasiirka ayaa waxaa la hordhigay xalay warbixin ku saabsan heerka ay kala gaarsiisan yihiin Maamulka Kismaayo iyo Afgaduud oo ah Sarkaal aad ugu dhaw Madaxweynaha Soomaaliya C/llaahi Yuusuf.

Ciidamadii uu watay C/risaaq Afgaduud ayaa Magaalada Kismaayo xoog loogu soo saaray kadib dagaal ay isaga hor yimaadeen Maleeshiyaad ka soo jeeda Beesha Mareexaan.