1.Amuurahakan dhacay iyo ragoow, waxa adduun jooga
2.Ashqaraar u dhimay ruux hadduu, aad u fiirsado e
3.Aakhirusamaan inay tahaan, muran ka oognayne
4.Muslinkoo uluuf iyo uluuf, alif malaayiin ah
5.Edeg bay ku kala xiran yihiin, oodo dhacameede
6.Midkii arax ka jaba qaarka kale, waa ku oriyaane
7.Kay indhuhu dhacaan oon arkayn, waxa ku soo aaddan
8.Usha uma qabtee kooda kale, waa ag marayaaye
9.Haddii uusan uub qodan ku ridin, waw asxaan falaye
10.Midka loo itaalsheegto oo, cadaw abraaraayo
11.Arligiisa kii laga qaxshoo, laga eryoonayo
12.Inta ay awood biiriyaan, uma nusreeyaane
13.Haddii ay islaam dhaba yihiin, laguma aadeene
14.Falastiin aboodiga ku lalay, kuma abaadeene
15.Israa\'iil ma boobeen dhulkii udugga weynaaye
16.Aqsa(1) iyo ariixa(2) iyo janiin(3), aradka raamaalle(4)
17.Yuhuud kuma askaaxeen dhashuu, dilay adoogoode
18.Indhahooda oo shana harkii, eydu ma cunteene
19.Dumar wada asay qaatayoo, odayadii waayey
20.Oohintooda yuuskaa dhegaha, lagama awteene
21.Ooslo iyo madriid lama janteen, lamana aadeene
22.Afarta beynu jaho gaaladii, sooma ururteene
23.Afgaan laguma duuleen habeen, uumiyuhu seexday
24.Shabax(5) muu ataageen shabaab, Aake qura haysta
25.Ashahaado kii qirahayoo, ehelu tawxiida
26.Istiqaamo kii laga heloo, faralka oogaaya
27.Irhaab laguma sheegeen midkaan, gaalka aayidine
28.Amriikaanka uma caabudeen, sida ilaahoode
29.Laguma andacoodeen hub iyo, aalad naga roone
30.Ilaahii adduunyada dhisana, lama illaaweene
31.Afartaa qalbiga oogsadiyo, oh iyo wayday dheh
32.Eedaadka nabaraan qabiyo, alaladkaygii dheh
33.Afar kalana waa duco alliyo, eebbe midaan tuugay
34.Allahayoow iblays iyo kuraa, noo itaafaqaye
35.Allahayoow axsaab buu mar kale, soo abaabulaye
36.Allahayoow inaanaan abyoon, waad na aragtaaye
37.Allahayoow waxay nagu galeen, waa islaanimo e
38.Allahayoow addoon bay rabaan, inaan ahaanaaye
39.Allahayoow nimaad uuntay iyo, aadmi leeyahaye
40.Allahayoow adaa qaadiroon, lagu ijbaarayne
41.Allahayoow adaan ka ashtakoon, eed nin kaagalaye
42.Allahayoow awoodaada weyn, adigu noo muuji
43.Allahayoow halkii caad mariyo, aala Luud raaci
44.Allahayoow kuwii nuux inkiray, eede dabadeede
45.Allahayoow sidoodii uqaraq, waa ilma adeere
46.Allahayoow annana naga najee, waxaad ku aafayso
47.Allahayoow islaamkana quwee, waa itaal gabaye
48.Allahayoow ducada iga ajiib, kuu allawsadaye
(1) Aqsa : Masjid al-aqsa oo ku yaal magaalada Qudus ee Falastiin.
(2)Ariixa, (3)Janiin, (4)Raamallah: Magaalooyin ka mida dhuka Falastiin .
(5)Shabax : Diyaaradaha dagaalka ee maraykanka tooda ugu casrisan.
Isxaaq Cali Diiriye E-mail: isxaaqd@hotmail.com