Amaandaro xoogan oo Mahadaay ka taagan

(SomaliNet) Wararka ka imaanaya degmada Mahadaay ee gobolka Shabelada hoose ayaa sheegaya in amaandaro xoogan ay ka taagan tahay deegaankaasi, iyadoo uu aad u sii yaraanayo isku socodka gaadiidka ee isaga kala goosha gobolada dalka, gaar ahaan kuwa isticmaalo wadada marta degmadaasi.

Kooxo burcad ah ayaa ku soo badanaya deegaankaasi tan iyo markii uu meesha ka baxay maamulkii Maxamed Cumar Xabeeb ee (Maxamed Dheere) oo ka talin jiray gobolka Shabeelada dhexe ee Somalia, iyadoo kooxahasi ay dilal iyo dhacba u geystaan dadka safarka ah ee la socda gaadiidka mara wadada Mahadaay.

Xalay ayaa nin ka mid ah ganacsatada ku dhaqan degmada Mahadaay lagu dilay kadib markii kooxo hubeysay ay tacshiirad ooda kaga qaadeen dad safar ahaa oo marayay wadadaasi, taasoo soo dedejisay dhaawaca ninkaasi ganacsadaha ah oo kolkii dambe u geriyooday dhaawaca soo gaaray aawgiis.

Tan iyo markii uu amaanka fara ka baxay ayaa waxaa jiray in odayaal ka tirsan dadka ku nool deegaankaasi ay isku taxaluujiyaan in sidii meesha looga saari lahaa kooxaha burcada ah ee deegaankaasi ku soo badanaya, waxaana jirta in maamul aysan la heyn deegaankaasi.

Kooxo burcad ah ayaa ku soo bedenaya wadada isku xirta Jowhar iyo Mahadaay ee gobolka Shabeelada hoose, kuwaasoo dhac iyo dilal u geysta dadka ku safra wadadaasi.