Ciidamo Puntland ka tirsan oo Baydhabo ku wajahan

(SomaliNet) C

Wararka laga helayo magaalada Baladweyn ee xarunta gobolka Hiiraan ayaa sheegaya in ciidamo aad u fara badan oo ka yimid dhanka maamul goboleedka Puntland ay ka gudbeen magaalada Baladweyne ee gobolka Hiiraan.

Warku wuxuu intaa ku darayaa in ciidamadaasi oo wata in ku dhaw ilaa 40 gawaarida dagaalka ay ku sii jeedaan dhanka magaalada Baydhabo oo fariisin ku meel gaar ah u ah dowlada federaalka ee Somalia, waxayna ciidankaasi wateen dresska lagu yaqaano ciidamada dowlada Somalia, iyagoo xalay saqdii dhexe ka talaabay deegaanka Baladweyne.

Ciidamadaasi ayaan la kulmin wax qalalaase ah intii ay jidka ku soo jireen, mana jirta ilaa iminka wax faah-faahin ah oo la xiriirta ujeedada socdaalkooda, laakiin waxaa loo maleynayaa inay ku biiri doonaan ciidamada dowlada Somalia ee Baydhabo ku sugan.

Bishii hore ayaa ciidamo ka tirsan maamul goboleedka Puntland uu isku hor-imaad ku dhexmaray iyaga iyo maleeyshiyooyinka deegaanka Matabaan, kaasoo ka dhashay qasaare isugu jira dhimasho iyo dhaawac.