Dhoofinta dhuxusha oo wali ka socota dekeda Baraawe

(SomaliNet) Dekeda magaalada Baraawe ee gobolka Shabeelada hoose ayaa wali waxaa si weyn uga socda howlihii dhoofinta dhuxusha waqti ay dowlada federaalka ee Somalia ay ku dhawaaqday in la mabnuucay dhoofinta dhuxusha iyo ugaarta.

Doon lagu rarayo dhuxul la dhoofinaya ayaa ku xiray dekeda Baraawe ee gobolkaasi, iyadoo masuuliyiinta maamulka degmada Baraawe ay ka gaabsadeen inay ka hadlaan dhoofinta dhuxusha ee degmadaasi ka socta.

Kooxo ganacsato ah ayaa si ba\'an nabaad guur ugu haya dhirta qoyan ee ku yaala gobolkaasi, iyadoo ay haatan sii muuqaneyso in mar kale dib loo furay dekeda Baraawe oo awal horey u xirneyd waqtigii ay midawga maxkamadaha islaamka la talin jireen inta badan koofurta Somalia.

Dhawaan ayaa wareegto uu soo saaray madexweynaha dowlada federaalka ee Somalia lagu mabnuucay in la dhoofiyo dhuxusha iyo ugaarta, taasoo lagu sheegay in talaabo sharciga waafaqsan lagu qaadi doono qofkii lagu helo isagoo arimhaasi faraha kula jira.

Todobaadkii hore doon dhuxul lagu raray ayaa ku gubatay dekeda Kismaayo, taasoo la sheegay inay ku sii jeeday dalka Isutaga Imaaraadka Carabta.