Iska hor-imaad ka dhacay xabsiga Garoowe

(SomaliNet) Ugu yaraan hal qof ayaa ku geeriyooday inta la hubo, iyadoo ay sadex qofoodna ku dhaawacmeen kadib markii uu maanta halkaasi iska hor-imaad ku dhexmaray ciidamada daraawiisha ee Puntland iyo kooxo aan la garaneynin

Maleeyshiyaadka weerarka ku sooqaaday xabsiga dhexe ee magaalada Garoowe ayaa lagu soo waramayaa inay halkaasi kala baxeen sadex qof oo horey maxkamada sare ee maamul goboleedka Puntland ugu xukuntay dil toogasho ah kadib markii ay ku cadaatay inay ka dambeeyeen dilal horey u dhacay.

Afhayeen u hadlay ciidanka ilaalada xabsiga ayaa sheegay inay garanayaan maleeyshiyaadka weerarka ku soo qaaday xabsiga dhexe ee maamulka Puntland isla markaan la baxay mabiis dil suga yaal ahaa, laakiin wuxuu afhayeenku ka gaabsaday inuu cadeeyo halka ay ka soo jeedaan kooxdaasi, wuxuuna tilmaamay inay ku raad joogaan sidii ay gacanta ugu soo dhigi lahaayeen kooxda maanta weerarka ku soo qaaday xabsiga dhexe.

Ma ahan markii ugu horeeysay ee weerar gaadmo ah lagu soo qado xabsiyada Puntland, iyadoo dhowr jeer oo hore ay kooxo dableey ah ay maxaabiis dilal lagu xukumay la baxeen, iyadoo ilaa iyo hadana aysan jirin cid loo sooqab qabtay falalkaasi.