Garoowe: (pp)- Wafti ballaaran oo uu hogaaminayo madaxwaynaha maamul gobaleedka Hiiraan State Maxamuud Cabdi Gaab iyo kuxigeenkiisa ayaa maanta soo gaaray magaalo madaxda Puntland ee Garoowe islamarkaasna waxaa ay Dowlada Puntland ku amaaneen sida wayn ee loogu soo dhaweyey deegaanada Puntland gaar ahaan Magaalada Boosaaso ee xarrunta Gobalka Bari oo ay ku soo hormareen, iyagoo halkaas oo ay kulamo kala duwan kula qaatay madaxda Gobalka iyo kan degmada boosaaso.
Waftigaan ayaa markii ay soo gaareen magaalada Garoowe waxaa ay shir jaraa’id ku qabteen hotelka Maka Al-mukarama ee magaalada Garoowe islamarkaasna kaga warbixiyey ujeedada ay u yimaadeen deegaanada Puntland iyaga oo xusay in ay ka soo dageen Magaalada Bosaaso halkaas oo ay sheegeen in si wayn loogu soo dhaweeyey.
Madaxwaynaha Maxamuud Cabdi Gaab ayaa ka warbixiyey waftigaan iyo ujeedada ay u yimaadeen Puntland isaga oo sheegay in ay Puntland u yimaadeen sidii ay u wada shaqayn lahaayeen, maadaama ay yihiin maamul cusub oo ku soo biiriay maamul maamulada ka jira dalka soomaliya. Sidoo kale waxaa uu madwaynuhu intaas ku daray in ay kulamo la qaateen madaxda dowlada Puntland gaar ahaan madaxwayne kuxigeenka Puntland Gen. Cabdisamad Cali Shire isaga oo sheegay in ay wax badan
ka wada hadleen gaar ahaan sidii ay Dowlada Puntland gacan uga siin lahayn wada shaqaynta maamulka soomaliyeed ee Hiiraan maadaama uu yahay maamul cusub.
Madaxwayna Maxamuud Cabdi Gaab -ayaa intaas ku daray in labada dhinac ay isku afgarteen sidii ay uga wada shaqayn lahaayeen xiriirka labada maamul iyo ka wada shaqaynta sidii marxaladaha kala duwan ee ka jira dalka soomaliya ay door uga wada ciyaari lahaayeen & sidii loo soo celin lahaa Qaranimadii soomaliyeed ee burburtay sanadii 1991.
Dhanka kale waxaa uu madwaynuhu sheegay in ay doonayaan in shirka labaad soomaliya ee wadatashiga uu haboonaan lahaa in lagu qabto gudaha dalka soomaliya gaar ahaan meelaha ay ka jiraan Amaanka iyo xasiloonida sida Puntland oo mudan in shirkaas lagu qabto sababtoo ah waxaanu aragnay buu yiri intii aanu ku sugnayn Puntland in ay tahay hoyga nabada ee soomaliya.
Ugu dambayntii waftigaan ayaa xusay in dowlada ku meel gaarka ah ay ka codsadeen in ay maamul Gobaleedka soomaliyeed ee Hiiraan ay ula shaqayn lahaayeen balse waxaa uu xusay in ay ku guul daraysatay DKMG ee soomaliya in ay la shaqayso maamulkaas maadaana uu sheegay in dhexdeeda ay ku mashquuleen isqab qabsi iyo muran habaabiyey marxalada soomaliya.
